Conto Satua Anggen Aksara Bali lan Aksara Lantin nyane sane mamurda "Ayam Ijo Biluk" punika dados kadowload ring link sor....
https://drive.google.com/open?id=0B8FEQUr82rmFZUVJd3ZJbk5tNFU

AYAM IJO BILUK

          Ring desa Biluk Negara, amangkinan sampun kasamen kawastanin Desa Baluk, wenten jadma mawasta I Gede Tanggu. Pondok dane paling sisi kangin. Dane madue kakasian jadma jawi saking Banyuwangi. Antuk parab ipun pangawi kirang terang. Ipun ngawehin I Gede Tanggu ayam kalih diri, lua muani. Anggen dane bibit. Rupan ipun makakalih pateh sami mabulu ijo gading, tras jago, sandeh, dimpil tengen, ikuh sengker biluk ka samping.

Ri sampune ayam punika ageng tur sane lua sampun ngelah panak, ida Anak Agung ring jembrana miring orti punika. Raris kanikayang ngedih ayame sane muani punika. Dane I Gede tanggu mula bakti ring ida Anak Agung raris kawastanin ayam punika ijo biluk, wireh ikuh ipun sengker malih keni ring desa Biluk.

          Wenten sawatara tigang sasih makurung ring puri, Ida Cokorda ring Mengwi miring orti. Raris ida maputusan saha lingga tangan ngarsayang ayam punika ring ida anak agung ring Jembrana. Ida Anak Agung Jembrana mula bakti ring Ida Cokorda, raris katur ayam punika ka Manguwi. Rawuhing Ida Anak Agung sareng lunga ka Manguwi muatang ayame punika. Di sampune nampak Ida ring puri Manguwi, Ida Anak Agung ring Badung miring ortine punika. Raris Ida ngamargiang telik, nelikin ayam druwen Anak Agung Jembrana punika.

          Disampune kawaspada antuk dutan Ida, gelis malih katur ring Ida Anak Agung Badung, Ida Anak Agung raris mapraraman ring Bagawantan Ida, atur ida padanda kadi sumbung manguningayang,

“Inggih yaning bantas ayam marupa ijo, titiang tan wanten meweh manandingin. Malihne boya baos sane sampun-sampun, kudang ayam marupa ijo pademang titiang ngantos kakaonan cokor I dewa budal sami.”

Duaning asapunikapangandikan Ida padanda, Ida Anak Agung raris nangun kakelcon tur ngundang sahananing para agunge. Nanging yaning maka unteng pakayunane gumanti pisan jaga ngamesehin ayam druwen Anak Agung Jembrana.

Ida Cokorde Mangui wireh olih lingga tangan pangulem, raris Ida ngandika ring Ida Anak Agung Jembrana, “kengken cening, wireh kaundang antuk Anak Agung ring Badung. Ida ngawangun kaklecan, bani rasa ngadu siape ne?”   

Matur Ida Anak Agung Jembrana, “ purun, wireh sampun suwe purun titiang. Yan antuk ala ayun ipun, titiang tan wenten purun nguningayang.”

Ida Cokorda raris ngandika.” Nah, yaning keto jalan mani suba gocek.” Benjangane Ida Cokorda Raris mamargi lunga ka Badung ngadu ayame punika.

Kabaos Ida Padanda, ngranjing ring pamerajan Ida. Irika Ida mapuja raris melingsa dados ayam marupa wangkas kuning, wok telatah lambih, godeg arang. Di baune Ida malingsa, raris keni sapa antuk Ida Hyang Mawisesa mangda Ida seda ring payudan wireh Ida sampun maraga sadu kayune kari sakadi dusta wenang malalingsen.

Gelising satua disampune sampun pada rauh ring kaklecan, matemu druen Ida Cokorda ring druen Anak Agung Badung, sane boya ja tios wantah ayam lalingsen punika. Raris durus mabuat antuk panagara. Disampune pada puput mataji, raris kabata ring tengah kalangan antuk juru kembar raris kalepasan. Matarung wantah apisan sami kanin piahne tur sami geen. Raris majadeng sue. Sane wangkas tan nyidayang ngutil, sane ijo naler tan wenten nyidayang  ngutil dening pada werat kanine. Pamuputne raris sapih.

Sedek punika yaning wenten kaon silih tunggil, minab bupati sane kakalih punika raris nangun yuda sawireh sampun pada tragia. Minab sampun Ida Sanghyang Mawisesa ngardia mangda sapih. Watek para agunge raris budal wireh sampun sore.

Ida Cokorda bau rauh ring puri, ayah Ida raris padem. Ida Anak Agung ring Badung bau rauh ring bagawantan Ida seda. Di sampune wusan kapratista, layon Ida Pedanda ring puri Ida Anak Agung ring badung raris wenten tumbuh ayam wangkas kuning, wok tlatah lambih godeg arang, kawastanin antuk Ida Anak Agung Rsi Nambi, wireh duk Ida Padanda malingsa dados ayam asapunika rupane.  

Conto Satua Aksara Bali lan Aksara Latinnyane sane mamurda "Ayam Sangkur" ring sor ....
https://drive.google.com/open?id=0B8FEQUr82rmFQ2FuSm1seEhUZGs

AYAM SANGKUR

            Makawinan wenten ayam sangkur, tan wenten ngelah kibul, punika wenten nyatuaang. Kabaos duk kala rihin ring jagat Jembrana, wenten jadma maparab I Tumtum, antuk desan ipun pangawi matur sisip. Ipun ngelah banteng kalih diri. Lebih ipun ring pabianne. Kala ipun jaga nenggala ring carik ipun, semeng-semeng ipun luas keabiane jaga ngejuk banteng ipun. Rauh ipun ring pabianne tan wenten banteng ipun panggiha. Mailehan rerehin ipun tur pagehan abian ipun sami kukuh, tan wenten sane rusak, irika ipun bingung makenehin. Ring pabianan ipun wenten wit kepuh ageng apuun miwah wit tiying tigang lingseh. I Tumtum raris merika, ring batan wit kepuhe negak masila raris ipun mesesangi.

            “Jro panunggun kepuh, banteng titiang ical iriki. Tulung patujuin tityang, dija ipun magenah. Yening kapanggih, tityang aturin jro panunggun kepuh ketipat akelan maulam ayam.”

            Bau asapunika munyin ipun, saget masuara banteng ipun ring batan tiying ipun. Sane itunin wenten ping dasa celepin ipun irika tan wenten kapanggih. Duaning asapunika raris ipun wangde nenggala. Terus ipun malih budal. Rauh ring pondok raris ngawe ketipat, nampah ayam, jaga anggen ipun nawur punagi. Ayam punika guling ipun. Sampun sami rateng, genahang ipun ring salange, ngantosang mangda lingsir pacang matur punagine.

            Malih ajebosne rauh pianak ipun saking melali, ajinange guling ayame punika. Mapuara nyud manah ipun raris jemaka kibul ayame daara tur ipun malih makaon. Sampun lingsir suryane, I Tumtum raris makinkin pacang keabiane. Bau wireh meonge irika magenah ring batang salang. Sampun puput babuatan ipun raris ipun majalan kabiane. Serauhe ring batan kepuhe punika, genahang ipun ketipate rauhing ulame raris ipun ngendihang geni pacang anggen nunjel menyan. Irika ipun kagiat ningalin guling ayame urip tur malaib tan wenten maikuh. Sengangat sengenget ipun miwasan menek, tan wenten kanten punapi-punapi. Raris dingeh ipun wit kepuhe masuara ngerem tur ngrehgeh, usan ngrehgeh wau wenten suara terang.

            “Eh cai Tumtum, cai tusing dadi naur sesangi ketipat mabe ben be guling. Benehne bukakak siape to buina gulinge to suba carikan krana ilang kibulne. Awake tusing nyak nampi, to krana buin urip awake ya. Pitui yen cai matamiu tusing dadi nganggon be guling numabunggkulan, musti recah.”

            Punika awinan I Tumtum wangde naur punagi, malih ngewlinin ngangge bukakak ayam. Indik puniki ring jagat Jembrana rauh mangkin jadmane tan wenten nauur punagi ketipat maulam guling, malihne ayame sangkur tan pisan kangge pacang daging bebanten.      

Cerpen Bali

Cetik

Timpal leket tiangé, I Buda, gelemné sampun ten dadi tulung. Awakné berag, sasai ngutahang getih. Makudang-kudang dokter kadén sané sampun ngubadin, nanging ipun nénten mrasidayang seger. Diagnosisné magenepan. Wénten sané ngorahang diabetes akut, wénten sané ngorahang keni tumor, wénten sané ngorahang sakit ginjal, sakit jantung, sakit ati. Makejang ten wénten sané uning napi sujatinné penyakitné I Buda. Sasukatné ipun dadi pejabat, magenepan pesu penyakitné. Ngantos ka dura negara ngrereh ubad, nanging durung mrasidayang seger. Né sanget padalemin tiang wantah mémén ipuné. Mara Mémén ipuné lega ngelah pianak pejabat mangkin sampun ngreres ngantiang mati. Kanti telah arta brananné anggona ngubadang masi ten nyidayang seger. Bapanné I Buda sampun makelo ngalain. Tiang inget mara dugasé niki Buda malali ka umah tiangé.

“Madé, icang lakar sasai luas joh. Runguang mémén icangé, nah, ” kénten I Buda kapining tiang.
“Nah, asal da engsap tekén timpal dogén lamun suba sugih,” tiang masaut asal.
“Béh, icang sing kal ngengsapin cai,” kéto pasautné sambilanga kedék.
”Eda masih ngengsap tekén Widhi.”
”Nah.”

I Buda sujatinné anak dueg, dharma lan ten taén ngelah daya corah. Nénten demen mapi-mapi. Napi ja sané kabaosang sakadi asapunika ring keneh ipuné. Nénten taén majanji-janji. Nénten taén mogbog. Mirib punika sané ngawinang ipun demenina teken anak-anaké ngantos ipun nyidayang dadi pamimpin yadiastun ipun anak sané nénten madué. Tiang percaya I Buda boya ja sakit médis. Sampun makelo I Buda nganggo ubad resép dokter, nanging ten wénten perubahan. Sakitné, pedas sakit niskala! Janten wénten ané nyakitin. Nanging tiang ten bani nyambatang I Ana utawi I Anu sané ngranayang. Adanné manusa, don sénté don plindo; ada kéné ada kéto. Ten makejang patuh keneh ipuné. Liu masi anaké ten demen tekén I Buda pamekas saingan ipuné. Anaké ngorahang yan suba terjun ring politik mangdané dueg-dueg ngaba raga. Yadiastun tiang boya ja politisi, tiang masih nawang yan ring politik, sané mangkin timpal, buin mani bisa dadi saingan. Ané mangkin ngajumang, buin mani bisa misuh-misuh dadi musuh. Sapunika taler tungkalikannyané. Samian menghalalkan segala cara. Wantah kepentingan sané kautamayang mangda kapolihang napi sané kabuatang. Sasukat I Buda sakit, liu anaké pada marebut lakar nyuang tongosné. Kéto kepir-kepiran ortinné sané piragi tiang di margané.

“Béh, mirib liu anaké ané ngamadakang apang I Buda énggal ngalain. Apang enggal maan nyuang “kursiné”, ngentosin tongosé ento,” kéto tiang mapineh-pineh.
“Mirib liu masih ada anak ané iri tur dengki kapining I Buda.”

Tiang nelokin I Buda di jumahné. Tingalin tiang I Karma, timpalné leket ané biasa ajaka gradag-grudug, mesuan uli di jelanan umahné. Mirib mara suud nelokin I Buda. Sasubanné tiang neked ditu, Mén Buda ngénggalang ngajakin tiang macelep ka kamar, ningalin I Buda. Awakné berag, lemet, paningalanné barak. Sayan wai sayan nyangetang dogén sakitné I Buda. Jani ia sing nyidayang bangun.

“Dé, nglaut I Buda kakéné. Kénkénang jani?” Mén Buda nakonin tiang.
“Béh, tiang ten nawang ampun, Mé,” tiang masaut makitak-kituk.
“Dé, mémé ba leleh gati kemu mai. Masih sing seger-seger pianak méméné totonan. Mirib né mula karman méméné,” kéto panyambat Mén Buda sambilanga sigsigan.

Tiang nginget-ngingetang, i pidan mémén tiangé taén ngorta, wénten jero mangku napi balian, tiang masih ten seken nawang, koné bisa ngubadin anak kena cetik. Nongos di bongkol gunungé, sasai masamadi nunas pica, nunas ica. Ajakin tiang Mén Buda mrika. Mabekel baas, daksina, tipat kélan, canang, lan bayuan tiang sareng Mén Buda nakonang ring baliané nika.

 Matakén Mén Buda, “Jero, napi sané ngranayang pianak titiangé sakadi asapunika?”
Jero balian nrawang. “Ne, ada ané sing demen.”
“Sira?”
“Anak. Di tongosné magaé. Kéné parisolahné.”
Baliané majalan nyrengseng. Mrika-mriki, sebengné gedé pesan. Ngingetang tiang ngajak…, ngajak…, sira nggih? Tiang engsap. Tiang ten bani nakonang adannyané tekén Jero Balian.
“Tebus atmané di Pura Dalem. Anggon banten anu, anu, anu. Énggalang né nebus apang énggal ia seger. Yan sing kéto pedas ia lakar ngalain.”
“Nggih Jero, matur suksma.”
Titiang sareng Mén Buda ngénggalang mapamit. Satekané saking umah baliané pramangkin Mén Buda kawantu olih kaluarganné répot ngaé banten. Tiang masih milu repot ngayahin.
“Madé, beliang kéné jebos.”
“Beliang kéto.”
“Tandingané kondén misi kéné-kéto.”

Jag magrebedan prajani di jumahné. Ada ané ngayahin I Buda, ada ané ngayahin tamiu ané madelokan, ada ané ngaé banten, magenepan.  Aget pesan ring rahinané mangkin bantené sampun pragat. Orahanga tekén Jero Baliané mangkin déwasa sané melah anggé nunas kasegeran. Makejang timpal-timpal di tongosné I Buda magaé ajakin tiang maturan ka pura dalem. Apang milu mabakti, nunasang ring Ida Betara mangdané I Buda énggal seger. Tiang nyangkol I Buda tuun uli kursi roda. Jero mangku ngantebang banten. Tiang ningalin makejang timpal-timpalné I Buda. Ten wénten sané ten teka mriki. Tlektekang tiang sakabesik.

“Ratu Betara…, sapa sira ja sané nyakitin I Buda mangda ketara mangkin,” tunas tiang ring manah. I pidan Buda sasai nulungin tiang yadiastun ia masi anak sing ngelah. Ajak tiang uli cenik, Buda mula anak polos. Nénten madaya I Buda lakar kakéné dadinné. Dugas ipun wau-wau ring politik, wénten masih keneh jejeh mémén ipuné.
”Buda, da ja milu-milu terjun ka politik. Anak politiké ento keras. Apa buin i raga tusing ngelah apa!” kéto mémén ipuné majarin.
Nanging I Buda kekeh jungkeh tur masaut, ”Mé, jani suba gantinné i raga ngwantu masyarakat kecil, kadung i raga ka gugu dadi wakil rakyat. Apang nyidayang nulungin anak lén. Apang nyidayang nglestariang gumi Baline.”
Jero Mangku sampun usan ngantebang banten. Sané wénten ring pura ajak makejang ngaturang bakti.
”Inggih asepin tangané. Om….”
Déréng suud pada mabakti saget wénten ané jerit-jerit, ”Kebus! Kebus!”
Makejang matolihan tur ngénggalang bangun. Tiang ané ngisiang I Buda ten nyidayang ningalin sira sané jerit-jerit. Anak-anaké pada biur.
”Aduh! Aduh!” buin ia jerit-jerit.
”Mé, ajak malu I Buda, tiang lakar ningalin sira ja nika.”
Tiang majujuk lan nylebseb di selag-selagan anaké ané lénan makita ningalin.
”Mrikayang akidik, mrikayang akidik,” kéto abet tiangé sahasa ngamaluang.
Sasampunné di malu, tiang makasiab. Tiang ningalin awak ané gedé, barak biing, mabulu, ten cara manusa. Makejang ten masuara. Ngob. Mara makipekan tiang buin makasiab. Karma?

_PUPUT_

Ulian Lacur

(Nengah Rusmadi)

Peteng dedet puniki pinaka saksi sebet kenehé tan kadi-kadi. Ulian nasibé jelék tampi tiang dadi manusa ané tumbuh di guminé tiwas nékték. Yén umpamiang rasané uyah lengis nu makékéh mancan ngidang ngurabang anggo darang nasi. Sané mangkin Hyang Widi né micain pica sané ten ngidang rasané tiang manampi. Yén dadi seselang, pang sesai makita mamisuh, maseselan. Tuah ja mula niki sampun jalan idupé sané dados peduman.

Lacuré majumu ring petengé nika Saniscara Kliwon Wuku Kuningan, tiang sampun usan nyarengin pasangkepan ring balé banjaré ba delod. Dinané nika banjaré nyangkepang unduk pangabénan sané pacang kalaksanayang malih duang sasih. Usan sangkep, tiang marasa basangé seduk sajan, neked jumah tiang ka paon. Di paon dapetang kurenané sedeng ngoréng gerang.

“Kondén ada ajengan nasi Yan?” tiang matakon saha ngampakang grobag tongos ajengan nasiné.
“To sambel serané tuni nu bin bedik. Kanggoang?” saut ragané sambilanga ngadukang sané gorénga.
“Men ten ngantiang gerang?” malih ragané matakon kén tiang.
“Ba imang lebeng Yan? Bé seduk sajan basangé,” saut tiang sambilang nyekenang ningalin ka pangoréngané.
Tiang nyokot gerang punika acekot. Sedeng tiang seleg ngajeng, dingeh tiang wénten suaran anak majalan éncol pisan di delod umahé. Pajalané ngancan becat ngalih natahé.
“Putu… Putu… Wayan… Yan…,” kénten anaké nika kauk-kauk di subané neked di aep umahé.
“Yéh Mémé, kénkén sampun peteng kauk-kauk?” tiang matakon éran nepukin abahné mémé buka kéto.
“Yan Bapan cainé nyakitang basang uling tunian kanti malisah.” Saut ragané kanti angkih-angkih ulian malaib wawu.
“Men apa ladné maan ajenga ajak Bapa?” tiang malih matakon jejeh.
“Sing ja maan ngajeng apa, tuah nasi séla ajak jukut jepang dogén.” Saut ragané malih.
“Nah, nah ajak ka bidan jani dajané.” Kéto munyin tiangé saha malaib ka umah ba delod.
Neked delod dapetang bapan tiang sampun lemet tan sida naanang sakit.
“Ngidang Bapa majalan?” tiang matakon.
“Aduh…, bapa sing ngidang makrisikan Tu,” saut ragané adéng.
“Yén kéto, mai Pa tiang ngandong. Ajaka ka bidan.” Tiang nyemak bapan tiangé laut ajak ka bidan.

Petengé dedet ngaénang tiang ten ngidang énggal majalan. Suba uling tuni listriké mati. Anaké samian sampun madamar sentir. Mémén tiangé nutugin uling duri ngaba brokbok.

“Tu, cai ngelah pipis? Mémé nak sing ngelah pipis nang akéténg.” Kénten raos mémén tiangé di subané paek ngajak puskesmasé.
“Mémé da ngitungang kéto malu, né penting jani bapa maan ubad. Kanggoang malu jani ngidih tulungan ajak Bu Yani pang banga nganggeh,” punika tiang nyautin.
Di subané di aep puskesmas tiang ngetok pintu.
“Bu… Bu Yani,” tiang kauk-kauk sambilang ngetok jelané.
“Enggih sira drika?” saut ragané sambilanga ngampakang jelan.
“Yéh Bli Putu, éngkén nika bapaké?” ragané matakon nyingakin tiang ngandong bapan tiangé.
“Kénten Bu, bapan tiang nyakitang basang kanti nglinterin uli tunian,” tiang masaut.
“Oh…, mriki bakta ka kamar préksa dumun!” ragané nandanin tiang ngalih ruang préksa.
“Ampun uli jam kuda ragana sakit?” ragané matakon sambilanga ngukur ténsi.
“Kocap ampun uli jam tengah sia wawu Bu.” Tiang nyautin.
“Ané encén sanget sakitang Pak?” ragané matakon nyekenang kén bapan tiangé.
“Niki Bu,” bapan tiangé nujuang sakitné.
“Enggih, mangkin cobak Bapak penekang batisé nganti di duur sirahé!” bu bidan nundén bapa sambilanga ningting batisné bapa.
“Aduh… aduh…, Bu tiang tan ngidang naanang,” bapan tiang nuuh sambilanga ngeling.
“Pak Putu, niki bapak kena pinyungkan usus buntu, arus aba ka rumah sakit. Mangkin! Mrika ngrereh montor dumun tiang prasida nyarengin. Yén ten kénten tiang jejeh nyanan bapa nyangetang laut tan katulung.” Raos bidan seken pesan.

Runtag bayun tiangé ningehang raosé ento. Tiang inguh uli dija tiang kar ngamolihang jinah. Yén sampiné adep, ngelah tuah abesik ban ngadas ento kar anggo mayah turunan. Budi nyilih, dija lakun. Nanging jani suba sing ada jalan lén yan sing sampiné adep. Baat asané batisé matindakan nanging ulian kapepet neked masi tiang di umag Pak Gedé ané ngelah montor.

“Pak Gedé… Pak Gedé…,” tiang kauk-kauk uli natahné.
“Nyén…?” ragané masaut uli tengah sambilanga ngampakang jelan.
“Éngkén Tu adi ba peteng nogdog jelan?” kénten ragané matakon. Sebengné suba ngarwanang gedeg kén tiang.
“Lédangang Pak Gedé, tiang ba peteng mriki, tiang jagi ngidih tulungan mangkin sareng Pak Gedé. Bapan tiangé sakit sangét mangkin arus ka rumah sakit. Pak Gedé kayun nganter ka rumah sakit?” kénten tiang ngesor ngidih tulungan.
“Ngelah pipis cai kar anggon mayah?” saut ragané malih.
“Pak, mangkin tiang déréng ngelah jinah, nanging benjang tiang kar ngadep sampi. Kanggoang benjang wawu bayah tiang.” Tiang masaut seken.
“Nah, ba ya kéto. Men jani dija bapan cainé?” ragané matakon sambilanga nguasang jemak sereg montoré.
“Bapan tiangé di puskesmas Pak,” tiang nyautin.

Pak Gedé mesuang montor kijangné uli garasiné. Di subané tiang menék montoré maserét ka puskesmas. Neked di aep puskesmasé lantas marérén.

“Bu… Bu… montoré suba teka.” Tiang ngaukin ibu bidan uli natah puskesmasé.

Ibu bidan ngajak bapan tiangé pesu tur menék montor tur ngorahin tiang negak di duri ngisangin bapan tiangé.
Montoré majalan becat, sawatara jam solas neked di rumah sakit umum. Ibu bidan langsung tuun ngalih tongos informasiné. Uli montoré cingak tiang sampun teka perawaté makta tandu sané maroda.

“Turunkan Pak, pelan-pelan baringkan di sini,” kénten raos ragané sasampuné neked di samping montoré.
Tiang nuunang bapa, lantas sareng macelep ka kamar rawat kelas III ékonomi. Di sampingé suba ada pasién lén. Sawatara wénten tengah jam tiang ngantosang, wénten dokter sané mréksa bapa.
“Bapak saking napi?” dokter matakon.
“Tiang saking Banjar Batu, Pak,” tiang nyautin
“Men niki ané sakit sirané, sira wastané?”
“Niki bapan tiang, wastané Wayan Srija. Tiang sané nanggungjawabang, Putu Sida,” saut tiang.
“Kénkén Bapan tiangé niki, Pak?” tiang matakon nyekenang.
“Puniki Pak, bapaké kena pinyungkan usus buntu sané ampun parah, arus dioperasi secepatné niki. Mangkin unduk biaya sané arus sediang Bapak petang juta, nika sampun polih potongan sawiréh Bapak nganggo kartu miskin.” Punika raos dokteré nyelasang.

Rasa runtag bayuné buin teka. Asanenga telah peluh matahé pesu tiis. Ri kala bingung, tiang inget ajak sampiné. Yén adep paling liu maan piakan duang juta. Men dija aliang kakuangané? Itunganné tuah pragat di otaké ten polih pabeneh.

“Usahakan ampun dumun Pak, yén benjang ampun polih langsung hubungin petugas administrasiné, pasti langsung operasiné.” Kentel raosné malih sambilanga nguasang.
“Pak…, Pak ten dados prasi dumun, nanging biayané tiang mutang? Tulungin ja tiang Pak, bapan tiangé ampun ten ngidang naanang.” Tiang ngenduk ngidih tulung.
“Kanggéang dumun Pak, taler ampura banget yén ten wénten jinah ten dados.” Saut dokteré laut magedi.

Semengan pesan tiang ampun numpang bis mulih ka désa. Sadurungé mulih tiang mabesen kén mémé mangda becik-becik nongosin bapa dini. Neked di désa, tiang ka LPD nyelang jinah nganggo wala surat tanah. Tiang polih jinah limang juta. Mulih uli LPD, tiang malih ka rumah sakit makta jinah ka pegawai administrasi. Nanging sadurungé mrika tiang nengokin bapa ka kamar. Ring kamar dapetang tiang mémé suba bengong. Angkian tiangé sarasa nyat nyingakin bapan tiang suba makudung kekeh sing maangkian. “Bapa…!!!”